عاجل : “حرمنا الناس من فرحتها”.. برلمانية تنتقد طريقة استقبال منتخب مصر

قالت النائبة أميرة قنديل، عضو مجلس الشيوخ، إن حالة الفرحة التي عاشها المصريون بعد الإنجاز الذي حققه المنتخب الوطني لكرة القدم تعد لحظة استثنائية ونادرة من التلاحم الوطني، معتبرة أن المنتخب كان يستحق استقبالًا جماهيريًا واسعًا في شوارع القاهرة، يليق بحجم الإنجاز الذي حققه.

وأضافت “قنديل”، في منشور عبر صفحتها على “فيس بوك”، الجمعة، أن المصريين شعروا بالفخر والعزة والثقة بالنفس بعد أداء المنتخب، مشيرة إلى أن الجماهير داخل مصر وخارجها عاشت لحظات من السعادة الصادقة، وأن مشاهد الدعم والمساندة عكست حجم ارتباط المصريين بمنتخب بلادهم.

وقالت أميرة قنديل، عضو مجلس الشيوخ: “أنا اللي أفهمه سياسيًا إن دي لحظة نادرة، والناس، جموع الناس، فرحانة من قلبها، وحاسة بالقدرة، وحاسة بالفخر والعزة، والناس راضية، ورجعلها معنى الثقة بالنفس، والشعب اللي طول عمره مجنون كرة راضي عن أداء منتخبه”.

وأضافت: “المصريين في الخارج عملوا ملحمة في مساندة المنتخب، وآخر ماتش شوفته وسط أصدقاء، منهم اللي مفرج عنه، ومنهم اللي ممنوع من السفر، ومنهم اللي مش عارف يشتغل، وعمري ما هنسى الوشوش، والعياط، والفرحة المجنونة، والحب اللي مالي قلوبهم للبلد”.

وتابعت: “سياسيًا، لحظة اللُحمة العظيمة دي هي اللي بتهوّن مرارة الوجع الاقتصادي، وبتخفف مرارات تانية كتير، والغالب على الناس، على مدار السنين والأيام، هو حالة من الضغط والإحباط، فلما البلد كلها تبقى فرحانة، نحرمها ليه من لحظة تعبير شعبي جارف عن الفرحة دي؟”.

واستكملت: “المنتخب راجع من رحلة طويلة ومرهقة جدًا، علشان ناخده الساعة واحدة الضهر يلف بأوتوبيس مفتوح في الصحرا؟! ومحدش يقولي ده كان استقبال حافل أو إننا كنا مش ملاحقين على الزحمة، والأوتوبيس مكانه شوارع القاهرة، واللاعيبة مكانها وسط الناس اللي شبههم، اللي علّقوا عليهم فرحتهم ودموعهم”.

وأضافت: “الفرحة دي، واللمة دي، والمشاعر الحلوة دي، كان لازم تبقى يوم بطوله وسط الناس، في قلب الشوارع، وأي اعتبار آخر يحرم الناس من فرحتهم الغامرة، ويحرم المنتخب من حقه في استقبال حقيقي، وعفوي، وجارف، يمثل شعبًا قوامه 110 ملايين مواطن، فهو قرار خاطئ، ومحدود، وعديم الخيال.”

وتابعت قائلة: “عزيزي المسؤول… مصر كانت متصدرة مؤشرات البحث في العالم كله بعد الماتش الأخير، وكانت فرصة ذهبية لترويج السياحة، وإيصال رسائل سياسية، والاستفادة من النجاح الكبير اللي حققه ولادها.. وفرصة دول بيدفعوا فيها مليارات الدولارات، وإحنا جات لنا ببلاش على طبق ألماس، فنعمل بيها حاجة، مش ندلقها في وسط الصحرا”.

وأضافت: “عزيزي المسؤول، اللحظة دي ممكن تستخدمها، وتنفعك، وتعمل بيها شغل لوقت طويل قدام، وتكسبك جدًا، وترضي الناس… الناس يا عزيزي المسؤول، الناس… حيث الجنة من غير ناس ما تنداس”.