تفاصيل : مجدي الجلاد: تعرضت لحملات هجوم بعد انتقاداتي للانتخابات

عيد شافع يونيو 18, 2026 برلمان وأحزاب 0 زيارة

وجهت الإعلامية نبيلة البدوي سؤالًا إلى الكاتب الصحفي والإعلامي مجدي الجلاد، رئيس تحرير مؤسسة “أونا” للصحافة والإعلام التي تضم مواقع (مصراوي، يلا كورة، الكونستلو، شيفت)، قائلة: “كتير زعلوا منك بصراحة”، ليرد متسائلًا: “كتير مين؟” لتوضح: “أحزاب.. معارضة” وذلك خلال حوار تلفزيوني في برنامج “خارج النص”.

وقال “الجلاد” ردًا على السؤال: “آه ماشي، أنا بحسبك كتير من الناس لا، أنا بقى بكلم الناس، أنا بقى بشتغل عند الناس ولا عند الأحزاب، ولا عند البرلمان، ولا عند القصص دي كلها”، أنا بطلع أقول ما يمليه عليا ضميري، علشان كده كانت آرائي في المناظرات ديت – يعني جزء، مش بدي لنفسي أي فضل والفضل كله لله جزء من الحوار العام اللي اتعمل حول الملاحظات على الانتخابات، لأن المناظرات دي بدأت قبل الانتخابات واستمرت في الانتخابات”.

وتابع الجلاد: “جزء من هذا الزخم، وإن إم بي سي وبرنامج “الحكاية” بتاع عمرو أديب وإنه سمح ليا إن أنا أطلع أعمل مناظرات مع أنصار النظام أو أنصار الحكومة، وأبقى أنا بقول آراء الناس بتقولها في الشارع خلاص، ده يحسب برضه للدولة ويحسب للإعلام، لكن لما أقول الكلام ده، أنا أكيد في ناس هتزعل مني، أحزاب ما أنا كنت بهجم الأحزاب”.

واستكمل “الجلاد”:” أنا مش موجه ليه؟ أنا مش موجه، أنا بقول آرائي وممكن دلوقتي يكون بيتفرج علينا 5 أشخاص، 10، 2 أول ما شافوا بوز مجدي قفلوا على القناة، حولوا حقهم، ما بيحبوش، 2 قالوا نقعد نشوف الراجل ده بيقول إيه، فيتفقوا معايا في آراء ويختلفوا معايا في آراء، تلاتة تانيين يقولوا الله على كلامك، واحد يطلع يقول لك دا ما بيفهمش حاجة.. حقه.. الدنيا بسيطة جدًا، لكن أنا لما بطلع قدام المشاهدين بقول رأيي من قلبي ومن إيماني وقناعاتي إن ده في مصلحة مصر”.

وتابع: “ركزي معايا في الحتة دي.. أنا مش بعارض علشان أنا عايز أكون مش عارف إيه، أنا بقول الانتخابات دي كان يشوبها شوائب في مرحلتها الأولى.. طب أنا لما اتكلمت قلت الكلام ده، اتهاجمت.. خدي بقى المفارقة.. أول ما بدأت أنتقد الانتخابات، حتى من قبل الانتخابات العملية الانتخابية نفسها واختيار القايمة والقصص دي كلها والترشيحات والكلام ده، بدأت مناظرات عمرو أديب.. فقلت طيب، بهدلوني شتيمة، تمام؟ ولجان اتسلطت عليا وأحزاب”.

وأوضح الجلاد: “قلت يا جماعة المرحلة الأولى حصل فيها تجاوزات، على الهواء.. حصل بعدها بكام يوم، سيادة الرئيس عبد الفتاح السيسي – اللي أنا برفع له قبعة إنه لقى اعوجاجًا في الانتخابات وتجاوزات وتدخل- وأنقذ بقية الانتخابات”.

وبين قائلًا: بطلوا يشتموني بعد ما الرئيس اتكلم، وطلعوا يقولوا “الرئيس عنده حق”.. طب يا سيدي الرئيس.. ده رئيسي ورئيسك رئيس مصر صح؟ لازم نحترم مقام رئيس الجمهورية والفيتو اللي عمله، لكن في الآخر ليه أنا لما بقول إن في تجاوز تشتمني.. ليه؟ تغتالني.. ليه؟ تطلع تعليمات أشوفها بنفسي على جروبات بعض الأحزاب اللي هي بتاعة اللجان يقول لك “اشتموا مجدي الجلاد”، أنا شايفها بعيني”.

واختتم الإعلامي مجدي الجلاد حديثه قائلًا: “أنت مش متحمل رأيي ليه؟ هو.. هو حضرتك بتقول قرآن أو بتعمل قرآن؟ كل حاجة.. أنا في ناس بتنتقدني وتقول لي “أنت زفت”، أقول له شكرًا”.