الآن : بعد وداع كأس العالم.. رسالة مؤثرة من أحمد شوبير إلى نجله مصطفى

وجه أحمد شوبير سالة إلى نجله مصطفى شوبير، حارس مرمى منتخب مصر، وذلك بعد وداع المنتخب الوطني بطولة كأس العالم 2026.

تلقى المنتخب الوطني هزيمة من منتخب الأرجنتين 3-2 في مباراة بدور الـ 16 من المونديال، وأثارت حكم المباراة الفرنسي جدلا واسعًا بقراراته التحكيمية التي واجهت انتقادات كبيرة من نجوم كرة القدم حول العالم.

كتب أحمد شوبير رسالته على حسابه الخاص بموقع التغريدات “إكس”: “أكيد سعيد وفرحان بكل ردود الأفعال والاحترام الكبير لمنتخبنا الوطني وأكيد حزين جدا لخروجنا بفعل فاعل فاسد من المونديال، لكن دلوقتي حكتب مشاعر أب شاف ابنه وهو بيعافر وبيحارب وبيموت نفسه من سنين وبيواجه عقبات واتهامات على مدى سنوات لو كنت أنا مكانه كنت رميت الفوطة من زمان وقلت بلاها كورة من الأصل ولكني كل يوم كنت بشوفه وهو بيصمم على تحقيق حلمه إنه يلعب كاس عالم وكل فتره يقولي حاشرفك وأرفع راسك ويقولي صدقني أنا مش بقول كلام وخلاص وبكره تشوف وطبعا كنت باشجعه لكن للأمانه مكنتش مصدقه لكن هو كان مصدق نفسه”.

وأضاف: “كان ومازال وراه أم بمعنى الكلمه صدقت حلمه لحد ما بقى حلمها هي وحاربنا كلنا عشان نحقق حلمه لكن هو كان أكترنا ثقه تركيز وإصرار والتزام واحترام عايش حياه صعبه احتراف بمعني الكلمة، الأكل والنوم والتدريب الفردي بعيدا عن الفريق بمواعيد منضبطه مبيسبش حاحه للصدفة أبدا شغال بمبدأ ارضى ربك وأعمل اللي عليك واحترم مهنتك وسيب الباقي علي الله”.

وتابع: “عامل اللي عليه بما يرضي الله ومستنى المكافأه من المولي عز وجل لا بيسأل على عقد ولا فلوس فقط ولا غير واحد عنده حلم ومصدقه وواثق إن ربنا حيحققه وكل يوم يقولي حتعمل إيه وإنت شايفنى بلعب كاس عالم وربنا بيكرمني أنا والفريق كله للأمانة مكنتش بعرف أقوله إيه وكنت بخاف عليه إن الحلم ميتحققش لحد ما جه كاس العالم والحلم بقي حقيقه”.

واستطرد: “كمان لقيته بيتألق وربنا بيكرمه ويوفقه وكل ما أكلمه وأقوله هايل يابطل يقولي لسه معملناش حاجه بس انتوا ادعولي أقوله حاطلع أتكلم عليك النهارده في البرنامج يقولي لا اتكلم على الفريق وإدي للناس حقها أنا لا، أقوله يابنى لازم تاخد حقك يقولي اسمع كلامى وطبعا باسمع كلامه لأني محبش أزعله ولا أزعل حد من ولادي أبدا لأنكم متعرفوش قد إيه ولادي هما نقطة ضعفي”.

وواصل: ” المهم كبر الحلم وصدقناه وكلمته قبل ماتش الأرجنتين وسألته في أمل؟، رد قاللي: طبعا وحنكسب إن شاء الله وطبعا اتمنيت له التوفيق وطبعا أمه كانت قاعده حنبي مش بتبطل دعاء ولا صلاه، على أمل إنه يحقق حلمه هو ومنتخبنا لحد ماجات المباراة، وحسيت إن الأمل بيقرب ويقرب ويقرب ولكن فجأه اتسرق الحلم بفعل فاعل فاسد وخرجنا من كأس العالم بمؤامره شهد بيها كل العالم”.

واختتم أحمد شوبير رسالته المؤثرة:”خرجنا نعم من كأس العالم ولكن دخلنا التاريخ من أوسع أبوابه وأجبرنا الجميع على احترامنا وحفضل مستنى لحد مايحقق حلمه وأمله حتي لو كنت مش من أهل الدنيا لكن أكيد حاكون حاسس بيه وفرحان ليه، أوعى تزعل يا أوفا يا حبيبي إنت وكل نجومنا كفيتوا ووفيتوا ومعلش بقي يابني حتتعب 4 سنين تانى بس في الآخر والله حتحقق كل اللي نفسك فيه لإنى عارف إصرارك كويس ومتأكد إنك حتوصل لهدفك يا مصطفى يا مصطفى أنا بحبك يا مصطفي عشان خاطرى أوعى تزعل أبدا”.